– I slike tider treng vi ikkje mindre internasjonalt samarbeid. Vi treng meir.
– For første gang sidan 1990-talet vert det no fleire fattige i verda. Afrika trengte 20 millionar nye jobbar før pandemien. I staden har 20 millionar jobbar forsvunne. Bistand – både i form av pengar og kunnskapsoverføring – vert difor avgjerande framover. Og der vil Norec spele ei nøkkelrolle, seier utviklingsminister Dag Inge Ulstein.
Publisert: 29.03.2022
Sist oppdatert: 12.05.2026
Koronapandemien har sett mange av Norec sine utvekslingar på pause. Nærmare 300 utvekslingsdeltakarar over heile verda har reist heim. I dag kom utviklingsminister Dag Inge Ulstein til Førde for å høyre korleis Norec og samarbeidspartnarane har tilpassa drifta etter at grensene vart stengt.
– I ei krise som dette treng vi meir internasjonalt samarbeid, ikkje mindre. Sjølv om den fysiske utvekslinga er sett på pause, har Norec sine samarbeidesprosjekt fortsatt i digitale kanalar, for å sikre framdrift. Det står det respekt av, seier Ulstein.
Korleis drive internasjonalt samarbeid utan å reise?
Strenge reiserestriksjonar og smittevernstiltak verda over gjorde at Norec måtte finne nye måtar å jobbe med internasjonalt samarbeid.
Alle samarbeidspartnarane til Norec har fått høve til å endre planar som følgje av koronautbrotet, og Norec har motteke kring 60 søknader frå prosjekt som vil tilpasse seg koronasituasjonen.
– Norec var ein av aktørane som var først ute med ein klar plan for korleis ein skulle handtere pandemien, og eit eksempel til etterfølgelse for andre, seier Ulstein.
Unntakstilstand
I Norge begynner livet så smått å gå tilbake til normalt. På verdsbasis har det aldri vore registrert fleire smittetilfeller enn det var i går. Ulstein understrekar at dei sosio-økonomiske konsekvensane av nedstenginga kan bli meir alvorlege enn sjølve pandemien.
– 256 millionar menneske står i fare for å bli ramma av svolt. Det er ei dobling frå før pandemien braut ut. Jobbskaping og kapasitetsbygging vert avgjerande for å kunne nå berekraftsmåla. Per i dag ser det mørkt ut. Vi kjem ikkje til å lukkast, dersom vi ikkje bygger utviklingsarbeidet på tankegangen Norec er tufta på, med gjensidighet som berebjelken i arbeidet.
Som følgje av reiserestriksjonar har regjeringa foreslått eit kutt på 59,5 millionar til Norec i det reviderte nasjonalbudsjettet. Direktør i Norec, Jan Olav Baarøy ser likevel optimistisk på framtida, og understrekar at internasjonalt samarbeid aldri har vore viktigare.
– Når verda er tilbake til normalen, har vi den same vekstambisjonen for Norecutvekslingar i 2021 og 2022 som før korona. Dette er ein unntakstilstand, og vi skal bidra i dugnaden. I tida etter koronapandemien vil det vere behov for endå større internasjonalt samarbeid og utveksling, og då skal Norec vere klar, seier Baarøy.
