Utveksling gir læring som varer

Kvart år deltek over 400 organisasjonar i arbeidsutveksling gjennom Norec. Unge tilsette arbeider hos ein partnarorganisasjon i eit anna land. Der lærer dei nye arbeidsmåtar, utviklar fagkompetansen og får større forståing for andre kulturar. Etterpå kan dei dele erfaringane med kollegaene og organisasjonane sine. Kunnskapen kan også komme målgruppene til gode.

– Når unge fagpersonar arbeider side om side på tvers av land og kulturar, deler dei kunnskap og får nye perspektiv. Slik kan utvekslinga styrkje samarbeidet og gi betre løysingar for målgruppene, seier Tehetena Woldemariam, fungerande programdirektør for utveksling i Norec.

Norec måler resultata av utvekslinga gjennom deltakar- og partnarundersøkingar. Jamleg kontakt med deltakarar og partnarorganisasjonar gjer det mogleg å forstå tala i lys av erfaringane deira og bruke kunnskapen til å vidareutvikle ordninga.

På Norecs resultatsider kan du lese om samarbeid som har gitt betre behandling og kortare sjukehusopphald, styrkt unge entreprenørar og bidrege til nye arbeidsplassar, inntektsmoglegheiter og tenester. Det har også ført til større deltaking og fleire moglegheiter for jenter og unge.

Nye idear og varige endringar

For fleire organisasjonar har arbeidsutvekslinga gitt nye idear og bidrege til innovasjon. I djupneintervju fortel organisasjonane om nye aktivitetar, betre løysingar og nye tenester. Nokre har teke i bruk resultat og metodar frå aksjonsforsking. Andre har fått større merksemd om innovasjon.

I enkelte prosjekt har læringa ført til varige endringar. Organisasjonane har mellom anna utvikla nye prosedyrar, undervisningsmetodar og modular i pensum. Andre resultat er nye perspektiv i forskinga og meir systematisk deling av kunnskap.

Fleire i organisasjonen lærer

Heile 92 prosent av organisasjonane seier at Norec-prosjektet har vore viktig for kompetanseutviklinga deira.

Norecs database viser kompetanse innan mellom anna kommunikasjon og IT, opplæring, rettigheitsarbeid, medisin og forsking. Deltakarane seier at evna til å samarbeide med andre er den største endringa etter utvekslinga.

Mange deltakarar gir opplæring til tilsette og frivillige. Andre arbeider side om side med kollegaene sine og deler kunnskap gjennom dei daglege arbeidsoppgåvene. I organisasjonsundersøkinga svarer 68 prosent at også tilsette som ikkje har vore på utveksling, har lært gjennom utvekslinga.

Partnarane deler metodar

Nokre partnarskap har lukkast særleg godt med å lære av kvarandre. Ein organisasjon kan overføre ein arbeidsmetode til ein annan. Partnaren kan også tilpasse delar av ein metode eller modell til eit program som allereie finst.

Ein NUPI-studie av Norec-partnarskap viser at partnarane vurderer respekt og tillit som dei viktigaste verdiane i samarbeidet. Samtidig svarer 72 prosent at dei har opplevd praktiske eller organisatoriske utfordringar.

Utfordringane omfattar mellom anna avgrensa budsjett, visumproblem, utskifting av tilsette og skeiv fordeling av deltakarar. Nokre nemner også problem med punktlegheit, deltakarar som trekkjer seg kort tid før avreise, og forseinka tilbakemeldingar og utbetalingar frå Norec.

Større forståing for kultur og mangfald

I Norecs deltakarundersøking seier 96 prosent at dei er meir opne for andre kulturar etter arbeidsutvekslinga.

Læringa kan også få verdi for organisasjonen. I perioden 2020–2023 rapporterte 17 prosent av prosjekta om auka interkulturell kompetanse. Ein organisasjon laga ein policy for mangfald og inkludering. Ein annan rapporterte at kompetansen hadde bidrege til eit meir positivt omdømme. Organisasjonen hadde arbeidd med å bryte ned stereotypiar og byggje gjensidig forståing og respekt.

Det kan vere krevjande å ta imot tilsette frå andre land. I ei undersøking blant vertsorganisasjonane oppgav 13 prosent at integrering på arbeidsplassen var ei utfordring. Tolv prosent trekte fram arbeidet med å skape ei meiningsfull fritid etter jobb. Kultur og språk var dei vanlegaste grunnane til at integreringa tok tid.

Resultat for målgruppene

Alle Norec-prosjekt skal skape resultat for målgruppene som organisasjonane arbeider for. I organisasjonsundersøkinga seier 92 prosent at prosjektet har nådd sluttbrukarane sine.

På Norecs resultatsider finn du døme frå helse, næringsliv og sivilsamfunn. Samarbeida har mellom anna gitt raskare behandling og kortare sjukehusopphald, styrkt unge entreprenørar og bidrege til nye arbeidsplassar, og gitt jenter større deltaking og fleire moglegheiter.

Dette er styrken ved arbeidsutveksling: Kunnskapen flyttar med menneska, blir delt vidare og kan komme målgruppene til gode lenge etter at opphaldet er over.