Norec-tilskot til arbeidsutveksling: Utlysning med frist 1. september 2025

1. Om tilskotet

Norec støttar globale partnarskap for berekraftig utvikling ved å gi tilskot til arbeidsutveksling.

Tilskotsordninga gir unge medarbeidarar moglegheit til å skaffe seg internasjonal erfaring og ekspertise på berekraftig utvikling.

• Norec har som mål å støtte eit stort mangfald av utvekslingsprosjekt når det gjeld både tema, kompetanse, stader, deltakarar og partnarskap.

Norec skal bidra til å realisere norsk utviklingspolitikk og nå berekraftmåla. Utviklingspolitikken er utforma for å fremme økonomisk vekst, demokrati, menneskerettar, god styring og tiltak for å hjelpe folk med å komme seg ut av fattigdom permanent.

Tilskotsordninga er konkurransebasert. Alle fullstendige søknader blir vurderte basert på kriteria i denne utlysinga og samanlikna med andre søknader.

Sjølv om ein tilfredsstiller alle formelle og praktiske kriterium, er det ikkje garantert at ein vil få tilskot frå denne ordninga.

Søknadsprosessen består av to fasar:

Fase 1: Konseptutvikling

Først må søkarane sende Norec ei kort beskriving av prosjektideen sin. Viss ideen blir godkjend, vil dei få tilskot til å møtast fysisk og vidareutvikle han. Norec vil gi råd om og opplæring i å arbeide effektivt med ein internasjonal partnar og planlegge eit vellykka utvekslingsprosjekt.

Fase 2: Prosjektgjennomføring

Etter fase 1 kan søkarane sende inn ein fullstendig prosjektsøknad. Viss søknaden blir godkjend, vil partnarane få tilskot til å gjennomføre utvekslingsprosjektet.

2. Søknadsfrist og tilskotsmidlar

Søknader til fase 1: konseptutvikling (for nye partnarskap)

• Frist: september 2025.
• Totale midlar: 1,5 millionar NOK.
• Søknadsbehandling: Søkarane vil få ei endeleg avgjerd innan åtte veker. Avgjerda vil vere enten eit avslag eller ein invitasjon til å vidareutvikle prosjektideen. For søkarar som blir inviterte til å vidareutvikle prosjektideen sin, vil fristen for å sende inn ein fullstendig prosjektsøknad vere i februar 2026.
• Forventa startdato for utveksling: august/september 2026.

*Dette er dei totale midlane for denne utlysinga, som gjeld søknader om konseptutvikling (fase 1). Vi vil informere om tilgjengelege midlar for utvekslingsprosjekt (fase 2) i ei oppdatert utlysing før søknadsfristen i februar 2026.

Eksisterande partnarskap

Viss du har eit eksisterande partnarskap og vil utvide prosjektet eller søke om tilskot til eit nytt prosjekt som startar i august/september 2026, er søknadsfristen i februar 2026. Vi vil komme med ei oppdatert utlysing med meir informasjon om tilgjengelege midlar og nøyaktig søknadsfrist. Du treng ikkje å sende inn ein søknad om konseptutvikling før du sender søknaden om utveksling.

Eksisterande partnarskap som ønsker å inkludere ein ny partnar

Viss du vil inkludere ein ny partnar i ein eksisterande partnarskap, kan du søke innan 1. september 2025. Du må først sende inn ein søknad om konseptutvikling der du beskriv prosjektideen, og fullføre fase 1 med konseptutvikling.

3. Formålet med tilskotet

Formålet med dette tilskotet er å bygge opp gjensidig tillit og sterke globale partnarskap for berekraftig utvikling.

Norec er opptatt av å fremme institusjonell utvikling og innovative løysingar drivne fram av unge medarbeidarar med kunnskap, ferdigheiter og haldningar. Tilskotet er basert på Norec sin visjon og endringsteori. Det speglar dei to hovudprinsippa til Norec:

• Gjensidigheit: Alle har verdifull kunnskap dei kan dele. Alle partnarar i eit utvekslingsprosjekt lærer av kvarandre og drar nytte av kvarandre sin ekspertise.
• Unge deltakarar: Unge menneske utgjer ein stor del av befolkninga i verda, men har ofte ikkje moglegheit eller evne til å påverke avgjerder. Norec støttar arbeidsutveksling for menneske i aldersgruppa 18–35 år og hjelper dei med å skaffe seg erfaring og bidra til eigne lokalsamfunn.

Norec har eit særleg mål om å

• bygge opp kunnskap, ferdigheiter og haldningar som fremmar berekraftig utvikling
• forbetre organisasjonar si evne til å handtere mangfald og skape inkluderande arbeidsplassar
• styrke strategisk og institusjonell læring, innovasjon og utvikling på tvers av partnarskapa og innanfor organisasjonane
• skape eller støtte globale nettverk, praksisfellesskap og partnarskap
• støtte gjensidig læring, kunnskapsdeling og samarbeid for å nå berekraftmål 17
• auke eigarskap til, kunnskap om og bevisstheit om prosjekta blant dei tilsette i partnarorganisasjonane
• oppmuntre til innovative løysingar og forbetre kvaliteten på tenestene tilskotsmottakarane yter
• fremme den positive effekten for målgrupper og lokalsamfunn

Viktig merknad

Partnarskap støtta av Norec mellom Nepal og Bangladesh opplever for tida utfordringar med å få arbeidsløyve og visum. Dette gjer det vanskeleg å gjennomføre arbeidsutveksling. Når Norec vurderer søknader, må vi ta omsyn til om partnarane sannsynlegvis vil få dei nødvendige løyva eller visa.

4. Kven kan søke?

Partnarskap mellom følgande typar organisasjonar kan søke om tilskot frå Norec:

• sivilsamfunnsorganisasjonar
• offentlege institusjonar
• selskap i privat sektor
• multilaterale og globale organisasjonar

Søkarane må vere lovleg registrerte einingar innanfor ein av kategoriane ovanfor. Søknaden må innehalde nøyaktig og dekkande informasjon om organisasjonstypen.

Kvalifikasjonskrav til søkarane

• Partnarskapstilnærming: Søkarane må søke som eit internasjonalt partnarskap og samarbeide om å utvikle prosjektet.
• Kapasitetskrav: Søkarane må ha den administrative og økonomiske kapasiteten som trengst for å gjennomføre utvekslingsprosjektet. Meir konkret må alle partnarar oppfylle desse kriteria:
  • Ha eit styre (gjeld ikkje alle institusjonar i offentleg sektor).
  • Ha eit fysisk kontor og kunne gi deltakarane ein relevant arbeidsplass som fremmar læring og utveksling av kunnskap blant kollegaer.
  • Ha eit digitalt rekneskapsprogram. Excel som rekneskapssystem blir ikkje godtatt.
  • Kunne ta imot tilskot frå utlandet.
  • Ha reviderte og konsoliderte årsrekneskapar. Den reviderte perioden må ikkje ligge lenger tilbake i tid enn 18 månader. Dersom organisasjonen er unntatt revisjon, må du legge fram ei grunngiving og sende inn ein urevidert årsrekneskap.
  • Ha minst 3 lønte fulltidstilsette som arbeider med program, styring og administrasjon. Det kan gjerast unntak viss ein av partnarane berre har 2 lønte fulltidstilsette og kan gjere godt nok greie for korleis dei dekker den 3. fulltidsstillinga.
• Stad: Partnarane held til i Noreg eller i eitt eller fleire av landa på lista over Norec sine samarbeidsland.
  • I spesielle situasjonar, der Norec ser at prosjektet er svært relevant for Norec sine mål og har transformativt potensial, kan partnarskap omfatte land som ikkje står på denne lista. Men prosjekt må alltid gjennomførast i eit land som kvalifiserer til norsk utviklingshjelp (ODA-land).
• Kritikkverdige forhold: Ingen av partnarane kan ha pågåande saker som inneber etterforsking av eller skuldingar om kritikkverdige forhold, som brot på lover og forskrifter, interne retningslinjer eller etiske normer.
• Uteståande krav frå Norec: Partnarane kan ikkje ha uteståande refusjonskrav frå Norec når fristen går ut.
• Lengde på utvekslinga og alder på deltakarane: Søkarane må stadfeste at dei vil oppfylle Norec sine krav til lengda på utvekslinga og alderen på medarbeidarane som deltar i utvekslinga. Tilskotet frå Norec skal hovudsakleg dekke kostnader knytte til gjensidig utveksling av unge fagpersonar eller frivillige i alderen 18–35 år. Utvekslinga må vare frå 6 til 18 månader. Det kan gjerast unntak, men det må diskuterast på førehand med Norec.
• Etterleving av regelverk og ansvarleg forretningspraksis: Søkarar må stadfeste at dei etterlever nasjonal lovgiving om arbeid, helse, sikkerheit og miljø, og – viss dei er private selskap – at dei følger ansvarleg forretningspraksis.
• Etiske retningslinjer: Søkarar må stadfeste at dei som eit minimum følger Norec sine etiske retningslinjer og har retningslinjer for å hindre seksuell utnytting, misbruk og trakassering (SEAH) og for antikorrupsjon.*

* Viss søknaden om konseptutvikling blir godkjend, vil Norec be om at prosjektsøknaden frå partnarane inneheld meir informasjon om retningslinjene på dei ovannemnde områda.

Plikt til inkludering

Norec følger prinsippet om inkludering av marginaliserte grupper («leave no one behind»).

Norec har eit mål om å bidra til inkludering av menneske som vanlegvis ikkje deltar i globale partnarskap for berekraftig utvikling.

To typar organisasjonar blir særleg oppfordra til å søke:

• Organisasjonar som tradisjonelt sett ikkje er bistandsmottakarar, men som ønsker å styrke sitt internasjonale engasjement og samarbeid.
• Organisasjonar som består av, eller jobbar med, marginaliserte eller sårbare grupper.

5. Korleis blir prosjektet vurdert?

Norec begynner med å undersøke om søknaden oppfyller dei formelle kvalifikasjonskrava. Viss han gjer det, vil Norec vurdere søknaden basert på vurderingskriteria under punkt 2 nedanfor.

Norec kan også be om meir informasjon og dokumentasjon og ved behov gjennomføre referansesjekk.

Formelle krav

• Søkaren oppfyller kvalifikasjonskrava (sjå avsnitt 4. Kven kan søke?).
• Søkaren har sendt inn ein fullstendig søknad innan fristen.
• Ein person med signaturrett har skrive under på søknaden.
• Prosjektet er i samsvar med Norec sitt formål med tilskotet og dekker eit konkret behov (sjå avsnitt 3. Formålet med tilskotet).
• Prosjektet oppfyller OECD/DAC-kriteria for ODA-støtte (Offical Development Assistance).

Vurderingskriterium

Viss dei formelle kriteria er oppfylte, vurderer Norec prosjektet basert på følgande:

• Kapasitet: Partnarane har god økonomistyring og gode interne rutinar for å gjennomføre eit utvekslingsprosjekt.
• Tydelege læringsmål: Partnarane har klart definerte læringsmål og ekspertiseområde som utfyller kvarandre og sikrar gjensidig læring og kompetanseutvikling.
• Innovasjon og læring: Prosjektet fremmar utveksling av ny(e), innovativ(e) kunnskap, ferdigheiter og haldningar mellom partnarar. Prosjektet har potensial til å inspirere til nye tilnærmingar og større effektar på tvers av organisasjonar.
• Tilleggseffekt: Tilskotet frå Norec tilfører verdi til eksisterande program.
• Styrken i partnarskapet: Prosjektbeskrivinga i søknaden får fram dei unike styrkane til kvar av partnarane, eit solid og gjensidig partnarskap, felles eigarskap til måla og resultatrammeverket og dessutan samarbeid.
• Integrasjon med organisasjonen sine strategiar: Prosjektet er i samsvar med arbeidsplanane og strategiane til dei involverte organisasjonane.
• Tydelege resultat: Prosjektet har klart definerte, realistiske og målbare mål, med baseline/nosituasjon og indikatorar som gjer det mogleg å spore resultat.
• Varige resultat: Prosjektet har ein klar strategi for korleis måla skal forankrast hos kvar partnar, og korleis resultata skal haldast ved like etter at prosjektet er avslutta.
• Ekspertise og ressursar: Partnarane har ei god forståing av områda det skal utvekslast ekspertise innanfor, og har gode nok planar og ressursar til å gjennomføre prosjektet.
• Støtte til deltakarar: Det finst ein klar plan for å rettleie og støtte deltakarane før, under og etter utvekslinga.
• Risikohandtering: Søkaren har identifisert, analysert og redusert vesentlege risikofaktorar, mellom anna faktorar som kan påverke dei fire tverrgåande omsyna negativt.
• Kostnadseffektivitet: Budsjettet viser effektiv bruk av midlar.
• Andre omsyn: Norec tar også omsyn til følgande:
  • Samsvar med strategiane til den norske regjeringa og relevans for samarbeidsland.
  • Samansetninga av prosjekt i porteføljen til Norec.
  • Viss relevant: tverrgåande omsyn i norsk utviklingspolitikk, altså menneskerettar, kvinners rettar og likestilling, klimaendringar og miljø, og korrupsjon og kritikkverdige økonomiske forhold

Basert på denne vurderinga bestemmer Norec om vi skal gi tilskot. Ved behov kan oppfølgingstiltak for å handtere eventuelle identifiserte svakheiter takast med i samarbeidsavtalen.

Tilbakevendande søkarar

For søkarar som har fått tilskot frå Norec tidlegare, vil Norec gjennomgå

• resultatoppnåing ved tidlegare tilskot, inkludert prosjektresultat og resultatbasert styring
• risiko- og økonomistyring
• støtte til deltakarar
• samarbeid med partnarar
• evne til å bygge vidare på tidlegare oppnådde resultat, innovere og utvikle prosjektet

Eit prosjekt kan få tilskot i opptil 10 år til saman

Viss du søker om eit nytt prosjekt etter å ha nådd denne grensa, må partnarskapet enten inngå i eit nytt partnarskap / ei ny partnarsamansetning eller presentere nye forventa resultat/ekspertiseområde samanlikna med tidlegare prosjekt.

6. Kva kan du søke om?

Tilskotet frå Norec skal hovudsakleg dekke kostnader knytte til gjensidig utveksling av unge fagpersonar eller frivillige i alderen 18–35 år.

Fase 1: Konseptutvikling

Nye partnarskap kan søke om tilskot til å arrangere eit partnarmøte for å vidareutvikle prosjektideen. Du kan søke om opptil 150 000 NOK eller tilsvarande beløp i USD, basert på valutakursen på søknadstidspunktet. Norec dekker diett, overnatting, nødvendige visum og vaksinar i tillegg til reisekostnader.

Fase 2: Prosjektgjennomføring

Partnarskap som har fullført fase 1, som har ein pågåande avtale om prosjekttilskot med Norec, eller som nyleg har avslutta ein avtale, kan søke om eit utvekslingsprosjekt.

• Førstegongssøkarar kan søke om eit toårig prosjekt.
• Tilbakevendande søkarar kan søke om eit kortsiktig prosjekt (1–3 år) eller eit langsiktig prosjekt (3–5 år).

Norec gir i hovudsak tilskot for å dekke direkte kostnader ved å sende unge fagpersonar eller frivillige i alderen 18–35 år på internasjonal utveksling.

Dette omfattar følgande:

• lønn til deltakarane
• kostnader til reise, forsikring, skattar og avgifter, og bustad.
• utstyr deltakarane treng for å gjere jobben sin
• eit lite administrativt tilskot til partnarorganisasjonane

Utvekslinga må vare i minst 6 månader. Det kan gjerast unntak.

7. Søknadsprosessen

Denne utlysinga er for nye partnarskap som ønsker å søke om eit utvekslingsprosjekt med oppstart i august/september 2026.

Søkarane må først sende inn ei kort konseptbeskriving innan 1. september 2025. Søkarane vil få ei endeleg avgjerd innan åtte veker. Dei som blir godkjende, vil få tilskot til å møtast fysisk og vidareutvikle ideen.

Søkarar som fullfører den første fasen (konseptutvikling), kan sende inn ein fullstendig prosjektsøknad innan starten av februar 2026. Søkarane vil få ei endeleg avgjerd innan ti veker. Viss prosjektsøknaden blir godkjend, vil Norec sende søkaren eit tilbod med Norec sine vilkår.

Søknadene blir vurderte basert på kvalifikasjonskrava og vurderingskriteria ovanfor. Norec kan bruke både interne og eksterne rådgivarar i vurderinga.

Søknader vil bli behandla i samsvar med offentleglova.

8. Søknadsdokument for fase 1

Sist redigert: 27.05.2025